2026ko Iktus Jardunaldia errereferentziazko gune gisa finkatu da iktusaren inguruko ezagutza, prebentzioa eta ikuspegi integrala sustatzeko; izan ere, gaixotasun hori baita desgaitasunen eta hilkortasunaren kausa nagusietako bat. Aurreko edizioak izandako harrera ona ikusita, Arabako ESIak berriro ere berretsi egin du gaitz honek jotako pertsonei, haien familiei eta inguruneari eskaintzen dien arretan etengabeko hobekuntza bultzatzeko konpromisoa.

Arabako ESIak, Osakidetzarekin koordinatuta eta osasun-profesionalen, gaixoen elkarteen nahiz senideen lankidetzarekin, herritarrei zein osasungintzako profesionalei bideratutako jardunaldi berri bat antolatu du. Topaketa honen helburua elkargune, prestakuntza-eremu eta parte-hartze gune bat sortzea da, ezagutzaren trukea, eguneratze zientifikoa eta iktusaren ondorioekin bizi direnei bidean laguntzea ahalbidetuko duena.

Jardunaldian zehar, neurologiako adituek zein iktusaren arretan esku hartzen duten hainbat diziplinatako profesionalek hartuko dute parte; besteak beste, Iktus Unitateko erizainek, laguntza-kalitateko adituek eta gaixoen elkarteetako langileek. Bertan, hainbat gai jorratuko dira: prebentzioa eta arrisku-faktoreak, iktusa izan ostean sortu ohi diren zalantza nagusiak, laguntza-kalitatearen eremuan izandako aurrerapenak, gaixoei eta familiei laguntzeko programak, eta sendatzea nahiz zaintzen jarraitutasuna hobetzeko bultzatutako ekimenak.

Ekimen honen bidez, Arabako ESIak pertsonengan zentratutako arretarekiko konpromiso sendoari eusten dio; profesionalen, gaixoen, senideen eta elkarteen arteko elkarlanean oinarrituta, betiere gero eta berritzaileagoa, parte-hartzaileagoa eta bikaintasunera bideratutakoa izango den laguntza-eredu bat eraikitze aldera.