Arabako ESIko Farmazia Zerbitzua Farmaziako Teknikarien IV. Kongresu Nazionalean saritua
"Farmaziako teknikariaren funtsezko papera biologikoekiko terapien arrakastan HGIan" izenburupean, Arabako ESIko profesionalen txostenak kolektibo horrek Hesteetako Gaixotasun Inflamatorioaren (HGI) tratamenduen kudeaketan egiten duen funtsezko lana azpimarratzen du
Arabako ESIko Farmazia taldea Farmaziako Teknikarien IV. Kongresu Nazionaletik itzuli da, martxoaren 13an eta 14an Vigon ospatua, ahozko komunikazio onenaren aitortzarekin. Erizaintzaren Prestakuntza eta Aurrerapenerako Fundazioak (FAE) antolatutako ekitaldiak "Berrikuntza eta etorkizuna: Farmaziako teknikariaren eginkizuna ospitaleko farmazian" leloa izan du ardatz aurten.
"Farmaziako teknikariaren funtsezko papera biologikoekiko terapien arrakastan HGIan" izenburupean, Arabako ESIko profesionalen txostenak kolektibo horrek Hesteetako Gaixotasun Inflamatorioaren (HGI) tratamenduen kudeaketan egiten duen funtsezko lana azpimarratzen du.
Sarritutako lana AUO Txagorritxuko farmaziako teknikariek garatu dute: María de los Ángeles Garcíak, Tatiana Urzainquik, Zuriñe Fuentesek eta Blanca Carderok.
Hitzaldi irabazleak Farmazia arloko espezializazioa eta zorroztasun teknikoa nabarmendu ditu, gero eta konplexutasun terapeutiko handiagoa duen egoera batean. Lanak agerian uzten du tratamendu biologikoen arrakasta kudeaketa logistiko ezin hobearen mende dagoela zuzenean, non teknikaria hotz-katea jaso eta zorrotz kontrolatzeaz arduratzen den, baita stock optimizatu bat ziurtatzeaz ere, tratamenduetan etenak saihesteko. Gainera, profesional horiek paziente bakoitzaren osasun-hezkuntzan duten zeregin klinikoa nabarmentzen du lanak, batez ere lumak eta xiringak bezalako gailuak erabiltzen ikasteari dagokionez. Prestakuntza-lan horrek administrazio bakoitzaren atxikidura eta segurtasuna bermatzen laguntzen du, bizi-kalitatean eragin nabarmena duten terapien eraginkortasuna arriskuan jar dezaketen akatsak murriztuz.
Sari honek, egileei emandako norberaren aitortza izateaz gain, gure erakundeko Ospitaleko Farmaziaren asistentzia-kalitatea eta prestakuntzarekiko zein ikerketarekiko konpromisoa ere islatzen ditu.
