Itzuli da Gabonetako txoko osasungarria Olarizuko Osasun Zentrora
Abenduaren 9tik urtarrilaren 5era, auzoko bizilagunek bizi-ohitura osasuntsuak sustatzeko gune berezi bat izango dute
Olarizuko Osasun Zentroa Gabonetako espirituz bete da berriro, ukitu osasungarriarekin. Abenduaren 9tik urtarrilaren 5era, auzoko bizilagunek bizi-ohitura osasuntsuak sustatzeko gune berezi bat izango dute.
Zentroaren sarreran, tradizioa eta osasuna uztartzen dituen informazio-puntu bat jarri da. Bertan, Mari Domingik aholku praktikoak ematen ditu neguko sintomarik ohikoenei aurre egiteko, hala nola hotzeriak, eztarriko mina, beherakoa, sukarra edo goragalea. Bestalde, Olentzerok gabonetako errezeta gozoak eta orekatuak partekatzen ditu, gure ongizatea zainduz jaietako gastronomiaz gozatzeko aukera dagoela erakutsiz. Gainera, mezuz betetako Gabonetako zuhaitz batek data horietan ere ohitura onak mantentzearen garrantzia gogorarazten du: elikagai nutritiboak aukeratzea, alkoholaren kontsumoa murriztea, kaloria gutxiagoko gozokiak prestatzea, aktibo mantentzea, atseden hartzea eta ondo lo egitea.
Ekimena harrera ona izaten ari da adin guztietako pertsonen artean. Informazio-materialak azkar agortzen dira, eta Gabonetan ere osasuna egunerokoan txertatzeko gero eta interes handiagoa dagoela adierazten dute.
