Araba ESIak Ingurumenaren Mundu Eguna ospatuko du
Bihar, ekainak 5, Ingurumenaren Mundu Eguna dela eta, Araba ESIak menu berezia eskainiko die ospitaleratutako pazienteei
"Erreimaginatu, berreskuratu eta zaharberritu, gure unea da!" lelopean, ekainaren 5ean egingo da ingurumenaren aldeko ekintza sustatzeko urteko ekitaldirik garrantzitsuena. Aurtengo herrialde anfitrioia Pakistan da, 5 urteko epean 10.000 milioi zuhaitz landatzeko asmoa duen proiektu handiagatik aukeratua izan dena. Urte horrek Nazio Batuen Ekosistemen Zaharberritzeari buruzko 2021-2030 Hamarkadaren hasiera markatzen du. Hamarkada horren helburua kontinente eta ozeano guztietako ekosistemen degradazioa prebenitzea, geldiaraztea eta lehengoratzea da, bertako biztanleen osasuna bermatzeko.
Testuinguru horretan, Araba ESIako Sukaldaritza Zerbitzuak seigarren urtez jarraian prestatu du Araba Unibertsitate Ospitalean dauden pazienteek bihar dastatuko duten menu ekologikoa. Menua Arabako babarrun nabarrez, landako oilaskoa irin ekologikoko ogiarekin eta postre jogurt natural ekologikoarekin osatuko da. Hori guztia ingurune hurbileneko produktu hautatuekin eta gehigarri kimikorik gabe landutakoekin egingo da.
Ingurumen kudeaketa arduratsua
2020an, Araba ESIak ISO 14001 ziurtagiria lortu zuen erakunde osoan, eta ingurumen-arriskuen kudeaketaren bidez ingurumena babesteko konpromisoa erakutsi zuen. Etorkizunean, ziurtagiri hori Murgiako Osasun Zentro berrira eta etorkizuneko AUO Txagorritxuko Zerbitzu Orokorren Eraikinera zabaltzea da erronka, horrela Ingurumen Kudeaketarako Sistemaren errendimendua optimizatzeko.
Inauguratu berri den Murgiako Osasun Zentroak A+ eraginkortasun energetikoa du. Eraikinaren berokuntza mota zoru erradiatzaile/freskagarriaren bidez egiten da, bero-ponpa aerotermikoen bidez hotza/beroa ekoizteko zirkuitu batean oinarrituta. Proiektatutako aireztapen-sistemak, airea tratatzeko unitateetan oinarrituta, eskatzen den gutxienekoa baino eraginkortasun handiagoa duten plakak berreskuratzeko gailua du. Gainera, zentroak erregulazio sistema zentralizatu batek urrunetik kontrolatzen ditu instalazio guztiak, web zerbitzari baten bidez.
Bestalde, Araba ESIak auto elektrikoen flota handitu du, eta 4 ibilgailu berri erosi ditu, erakundeak lehendik zituen 12 ibilgailuei gehituta. Ibilgailu horiek suposatzen dute karbono dioxidoen emisioen murrizketa garrantzitsua eta honela gure erakundeko garraioaren eraginkortasun energetikoa hobetzen da. AUO Santiagon, AUO Txagorritxun eta Lakua-Arriaga Osasun Zentroan ere kargatzeko estazio berriak jarri dira.
Gainera, Araba ESIak eraginkortasun energetikoa hobetu du, argiztapena aldatu baitu AUO Santiagon eta Olarizu Osasun Zentroan, % 75eko aurrezte energetikoarekin. AUO Santiagon ere kanpoko argiak aldatu dituzte, % 100 aurrezteko.
Bestalde, Olagibel Osasun Zentroan zubi termikoa hautsita duten leihoak jarri dira, beiraren eta arotzeria metalikoaren bidezko galera energetikoak murrizteko.
Erakundeak ingurumen-jasangarritasunerako hartu duen beste neurri bat Araba Unibertsitate Ospitalean bizikletentzat aparkaleku berriak jartzea izan da, profesionalek beren lanpostura bizikleta garraiobide gisa erabiliz joan daitezen sustatzeko eta, horrela, kontsumoa eta kutsadura murrizteko.
Azkenik, Araba ESIak atxiki zaio uraren erabilerarako eta kudeaketarako doako diagnostikoak egiteko programara AMVISAk (Vitoria-Gasteizko Ur Munizipalak, S.A.) Futura Planarekin garatutakoa. Plan honetan abiarazitako lanen artean, Araba ESIak eta AMVISAk lankidetza bateratua egingo dute, ura aurrezteko teknologien erabilera sustatzeko hiri- eta industria-erabileretan, bai eta kudeaketa-neurriak eta sentsibilizazio-neurriak ezartzeko ere.
