Araba ESIko Eguneko Ospitale Medikoa hasi da
Gaur, urriak 18, Araba ESIko Eguneko Ospitale Mediko berria hasi da. Ospitale hori Txagorritxuko eraikineko beheko solairuan dago, Kanpo-kontsulten eta Laborategien lehengo eremuan.
Halaber, Errehabilitazio kardiakoko Unitatea hasi da, Eguneko Ospitalearen ondoan dagoena.
Eguneko Ospitale Medikoak Onko-hematologikoaren antzeko antolamendua du, eta honako hauek ditu: 22 banakako boxer (azken belaunaldiko besaulki-ohea eta irakurtzeko argia dituztenak), tratamendu eta teknika bereziak egiteko 4 banakako gela, 10 kontsulta mediko eta erizaintzakoak, erizaintzako 2 kontrolgune, laguntza asistentzialeko eremuak eta bilera-gela bat.
Eguneko Ospitale Medikoan Ospitaleko zerbitzuetako (Alergologia, Erreumatologia, Digestiboa, Neurologia, Urologia, Barne-medikuntza, Neumologia, Endokrinologia, eta abar) tratamenduak behar dituzten paziente anbulatorioak artatzen dituzte. Era berean, AUO-ko Minaren Unitatea hartuko du, bi kontsulta mediko eta bereizmen handiko erizaintzako kontsulta bat, ekografiaren laguntzaren bidez infiltrazioak egiteko bi gela eta kirofanoa duen gela bat kontrol erradioskopikoa behar duten teknikak egiteko.
Instalazio berrien sarbideak
Gaurtik aurrera, pazienteak kanpoko sarreratik sartuko dira Eguneko Ospitaleetara, Txagorritxuko antzinako Kanpo-kontsulten sarreratik, hain zuzen. Gimnasioaren eta Errehabilitazio kardiakoaren eta Transfusio Zerbitzuaren kontsultetako sarrerak izango dira ate nagusitik eta AUO Txagorritxuko Erradiologiako itxarongelatik.
Ospitaleko langileen sarbidea Erradiologiako itxarongelatik egingo da. Ospitaleko atari nagusitik boxen eremu bakoitzera sartzeko txartel profesional elektronikoaren bidez (TPE) baimendutakoek, ordea, ez dute hortik sartzeko beharrik izango.
Hemendik gutxira, aipatutako eremuetara Ospitale barrutiko sarrera eta irteerak soilik egin ahal izango dira txartel profesional elektronikoaren bidez (TPE).
