Araba ESIk ongietorria eman die 86 egoiliar berriri
Astelehen honetan, irailaren 28an, Araba ESIn egonaldia hasiko duten profesional berriei harrera egiteko ohiko jardunaldia egin da AUO Santiagon
Guztira, 86 egoiliar, espezialitate ezberdinetako 43 BAME, horietatik 18, Familia eta Komunitate Medikuntzakoak; 2, Lan Medikuntzakoak; 1, Prebentzio Medikuntzakoa; 2, Pediatriako BAEE; 6, Familia eta Komunitateko Erizaintzakoak; 4, Obstetrizia eta Ginekologiakoak; eta 10, Osasun Mentaleko BAEE sartu ziren gure erakundean, astelehenean, espezialista izateko prestakuntza osatzeko.
Gehienak emakumeak dira, bai gure autonomia-erkidegokoak, bai estatu osoko hiri eta probintzietakoak: Madril, Bartzelona, Santiago, Santander, Cáceres, eta baita Errumania edo Txilekoak ere.
Egoiliarren belaunaldi berri horri harrera egiteko ekitaldia, COVID-19ren osasun-krisiak markatutako urtebetean, hiru saiotan egin zen: edukiera murriztua, maskarak, gelan banatutako soluzio hidroalkoholikoak eta kutsatzeak saihesteko prebentzio-neurri guztiak.
Hiru saioak Jesus Larrañaga Zuzendari Kudeatzailearen ongietorriarekin hasi ziren. Araba ESIko profesionalek osasun-krisi honetan bizitzak salbatzeko eta kolapsoak saihesteko egin duten lana aitortu zuen, eta guztien artean ekintza-batasun bat osatzearen garrantzia adierazi zuen, pazienteen eta herritarren aldeko erakunde hobea sortzeko.
Jardunaldian, gainera, Mikel Sánchez Eusko Jaurlaritzako Osasun Saileko Plangintza, Antolamendu eta Ebaluazio Sanitarioko Zuzendariak parte hartu zuen, eta azpimarratu zuen egoiliarrak funtsezko pieza direla kalitatezko osasun-sistema bat sortzeko, non prestakuntza, ilusioa, konpromisoa eta egokitzeko gaitasuna funtsezko elementuak diren.
Alde beroena sei egoiliar "nagusik" egin zuten. Bertan bizi izandako urteetako esperientziak eta bizipenak partekatu zituzten, eta bat etorri ziren enpatizatzearen eta umiltasunetik pazienteekin entzute aktiboa egitearen garrantzian. Aldi berean, azpimarratu zuten "besteak tratatzea nahi duzun bezala" ezinbesteko oinarria dela etapa berri honi ekiteko. Gainera, beren esperientzia pertsonalean oinarrituta, taldean lan egitea eta alboko langileen ezagutza ahalik eta gehien bereganatzea gomendatu zuten.
Jardunaldien gidaria Juan Ricarte izan zen, Arabako Familia eta Komunitate Arretarako Irakaskuntza Unitate Multiprofesionaleko Osasun teknikaria, eta berarekin batera, Arabako Unibertsitate Ospitaleko ikasketaburua Eduardo Fernández eta Arabako Familia eta Komunitate Arretarako Irakaskuntza Unitate Multiprofesionaleko ikasketaburua María Jesús Serna izan ziren.
Egoiliar berri hauekin, Araba ESIk, gaur egun, 271 egoiliar ditu prestakuntza-fase guztietan. Horietatik, 159 Arabako Unibertsitate Ospitaleko BAME, BAPE, BAFE, BAKE dira, 66 Familia eta Komunitateko Arreta Medikuntzako BAME, 7 Lan Medikuntzako BAME, 8 Emagin BAEE, 20 Osasun Mentaleko BAEE, 9 Familia eta Komunitateko Arretako Erizaintzako BAEE eta 2 Pediatriako BAEE.
