Arabako ESIko Erreumatologia Zerbitzuak ahozko komunikazio onenaren saria jaso du

Komunikazioak VEXAS sindromea jorratu zuen, adineko gizonei eragiten dien eta hainbat organotan hantura, artikulazio-arazoak, sukarra eta anemia eragiten dituen gaixotasun inflamatorioa

Erreumatologia Zerbitzuak Espainiako ahozko komunikazio onenaren saria jaso du, Espainiako Erreumatologia Elkarteak emana, American College of Rheumatology-ren aurreko Kongresuan, 2024ko azaroan, Washingtonen.

American College of Rheumatology (ACR) biltzarra ezinbesteko hitzordua da mundu osoko erreumatologiako espezialistentzat. Urtero, adituak, ikertzaileak eta osasun-arloko profesionalak biltzen ditu, gaixotasun erreumatikoen diagnostikoan, tratamenduan eta maneiuan aurrerapen berritzaileenak partekatzen diren gune batean. Ikaskuntza-foroa izateaz gain, ekitaldiak nazioarteko lankidetza eta ezagutzen trukea bultzatzen ditu, terapia berriak garatzen eta gaixotasun autoimmuneak eta muskulu-eskeletikoak hobeto ulertzen lagunduz.

Erreumatologia Zerbitzuak jasotako aitorpenak VEXAS sindromeari buruzko ikerketa-lana nabarmentzen du. Ikerketa-arlo horretan, taldea datuak biltzeko eta aztertzeko erregistro nazional baten buru da. Proiektuaren ikertzaile nagusiak Arabako ESIko Erreumatologia Zerbitzuko mediku ondokoak dira: Marta López i Gómez, komunikazioaren lehen sinatzailea eta saria jaso zuena, eta Paula García Escudero, lan honi buruzko artikuluaren lehen sinatzailea, Rheumatology (Oxford) aldizkari ospetsuan argitaratu berria. Gainera, azterlanaren garapenean beste zerbitzu batzuetako profesionalek lagundu dute, hala nola Hematologia eta Hemoterapiakoak, eta Barne Medikuntzakoak, proiektuaren diziplina anitzeko ikuspegia aberastuz. Saria Espainiako Erreumatologia Elkartearen Gaixotasun Autoimmune Sistemikoen Sinposioan eman zen, otsailean, Santanderren.

Azterlanaren ondorioen arabera, VEXAS sindromea hantura-nahasmendu konplexua da, batez ere adineko gizonei eragiten diena, eta hainbat organo arriskuan jartzen ditu. Erreumatologia-unitateetan artatutako pazienteen artean, giltzadura-sintomen eta konplikazio atipikoen maiztasun handiagoa ikusi zen, hala nola biriketako odoljarioa. Halaber, giltzurrunetako afektazioa lehenago jakinarazitakoa baino ohikoagoa dela aurkitu zen, eta mutazio genetiko eta konplikazio mediko batzuen arteko erlazioa identifikatzea ahalbidetu du, gaixotasunaren diagnostikoa eta tratamendua hobetzen laguntzen duena.