'ExpressYourClown'-ek irribarreak marrazten ditu Arabako ESIko Eguneko Ospitale Onkologikoan ere
Arabako ESIk martxoan zabaldu zuen 'ExpressYourClown' elkartearekin zuen lankidetza-proiektua, eta Eguneko Ospitale Onkologikora zabaldu du
Nobedadea da jarduera horiek helduei zuzenduta daudela
Arabako ESIren Eguneko Ospitale Onkologikoak proiektu berri bat bultzatu du martxoaren 28tik, 'ExpressYourClown' ospitaleko pailazo elkartearekin elkarlanean. Astelehenero, unitate honetako pazienteek elkarte honen bisita jasotzen dute, antzerki-inprobisazioen, umorearen, magiaren eta musikaren bidez, besteak beste, tratamenduak jasotzen dituzten bitartean itxaronaldia eramangarriagoa egiten baitute.
Minbiziaren Aurkako Espainiako Elkarteko (AECC) boluntarioen laguntza-jarduerarekin bat egiten duen ekimen honen helburua ospitaleak humanizatzen laguntzea da, pazienteengan oinarritutako arreta-eredu bat hartuz eta erakundeak berak eta Osasun Sailak ezarritako ildoei jarraituz.
Arabako ESIren Humanizazio Planak jasotzen duen bezala, humanizatzeak esan nahi du osasungintza atseginago eta pertsonengan zentratuago baten alde egitea, pazienteei entzutea eta haien beharrei erantzutea, eta profesional bakoitza pertsona ere badela ulertzea. Humanizazio-politikak, esate baterako, lan-ildo hauetan zehazten dira: harremanetarako gaitasunetan eta trebetasunetan prestatzea; osasun-gune atseginagoak, seguruagoak eta erosoagoak diseinatzea; adinekoaren hauskortasunari arreta emateko plana; Pediatriako pazienteei zuzendutako jarduerak; edo ospitale-farmaziatik sendagaiak etxera bidaltzea.
Ospitaleko pailazoak osasuna sustatzen duten profesionalak dira, umore fina eta barre-algara probokatzailea erabiliz ospitaleko giroa desdramatizatzeko, ez bakarrik pazienteentzat, baita inguruan dauden pertsona guztientzat ere. Barreak, umoreak eta maitasunak osasunean dituzten onurak esanguratsuak direnez, proiektu hau oso lagungarria da ospitalean bisitatzen edo lan egiten duten pertsonen bizi-kalitatea hobetzeko, pazienteen, senideen eta laguntzaileen aldartea hobetuz.
